أرشيف
حركة 20 فبراير كتدوي معاك بالدارجة
عامر الصديق/حركة 20فبراير
أولا : شكون هي حركة20فبراير ؟
* شباب دايرين النفس , و كيآمنو بالعز .. ولاد هاد لبلاد مكيقبلوش الظلم و الحكرة.
* هي حركة ديموقراطية , يعني غادي يكونو الاحزاب و الجمعيات و كل واحد غادي يقدر يقول لي بغا بلا ما يخاف..أول حاجة كتعطيها الحركة أهمية هي الشغل .. الخدمة خاصها تكون موجودة .. و الضمان الاجتماعي يكون لكلشي.. من العساس ديال الباركينغ حتى لمساعدة منزلية، و لي مخدامش يتخلص ماندا صغيرة من عند الدولة، حتى يلقا خدمة، من بعد الخدمة أهم حاجة هي الحرية، يعني كل واحد كيفاش باغي يسيير حياتو، و المغاربة راه ماشي كلهم كيف كيف، شي كيشرق و شي كيغرب و كيبقاو مغاربة و معندهوم لين على هاد لبلاد، و كلا بغي حريتو، و باغي راحتو، وباغي يعيش حياتو كيف ما باغا هو، إلى كانت عندنا الخدمة و الحرية الكرامة راها كاينة، و المغربي يقدر يرفع راسو و يقول : انا مغربي.
* الشباب (و دابا مبقاوش غير الشباب كاين الكبار و الصغار حتى هوما)، معندوش مع التسمسير ديال السياسة و البيع و الشرا فيها، و أغلبيتهم معمرو صوت و لا لاح شي ورقة على شي واحد و لا ترشح و لا باع صوتو بالفلوس..كانو مكيحملوش السياسة و السياسيين حيت عارفين القضية فيها الخنز و لوسخ، وهاذ الشباب مكيقبلوش شي واحد يصور لفلوس على حساب الفقر ديال وحدين خرين..فحال لي واقع فالكاريانات و الفيرمات ديال الكرفي و شي خلصة ما كاينة و البنات الفقيرات لي كيخدمو فديور الميسورين، كلشي هاد الشي مخصوش يكون أصلا و غدي نقضيو عليه.
ثانيا : آشنو باغيين؟
* البرلمان يتفركت ..”النواب” و “المستشارين” طالعين غير بالفلوس، و حيت المخزن لي مطلعهوم، وبزاف منهم مكيفكش الخط، و ميعرف يسير حتى كوري معسا بلاد و اقتصاد ..المخزن مكيخافش من هادوك ديال البرلمان و ميقدوش يقولو شي حاجة متعجبوش… البرلمان عندنا غير مسرحية، خاصو يمشي فحالو، و غادي يمشي بزز منو، و الحكومة فحال البرلمان و ما عندنا ما نديرو بيها و فيها غير صحاب الكاميلة و نسابهم و مادارو والو .. و كيبيعو المناصب..و كيخدمو غير صحابهم.
* بغينا الشعب ينتاخب واحد المجلس، يكونو بينوا أنهم كيفكرو فالشعب ماشي فروسهوم .. و يكونو قاريين و مجهدين، و هوما يديرو دستور لي غادي يقولو لشعب قبلو و لا رفضو فاستفتاء ديال بصح، والدستور راه مهم .. حيت فيه كيبدا التقوليب و تحراميات.
* كاين واحد المجلس سميتو مجلس الحسابات .. و هاد المجلس عندو بزااف ديال الأدلة على الاختلاسات و الشفرا، يعني هادو شفارا المخزن بنفسو معتارف راه شفارا، بغيناهم يمشيوللمحكمة مباشرة، نتا كتقول هوما شفارة، علاش ما زال كيدورو برا؟؟؟… و ملي نساليو مع هادو عاد غادي نشوفو الشفارا لكبار لوخرين ……. (لكبار ماشي الصغار)، و خصهوم يردو الفلوس و بزز منهم غادي يردوها و غادي يدوزو للمحكمة باش نتهناو من هاد القضية ديال لهريف عين باين و كلشي يجمع راسو.
* المطلب الرابع هو لي عذب شي واحد فالحبس، راه المحكمة فينا هي حتاهو، باش ميبقاش التعذيب تماما فالمغرب، ولا يتسامح مع هاداك لي تعدا عليه إلى بغا يسمح ليه…هدا هو العدل لي ملي يتقاد كلشي غادي يتقاد.
* خامس حاجة: هي كاينين ناس فالحبس مادايرين والو دخلوهم للحبس ظلم باش يخوفونا حنا باش مندويوش، يخرجو ملحبس و يعتاذرو ليهم و يعوضوهم.
* الاعلام يتحرر من الهيمنة المخزنية، ويولي عندك الحق تعبر على رأيك وتدوي على حقك فيه لأنك أنت لي تتخلصوا بالضرائب ديالك..
ثالثا: و دابا نشوفو آشنو باغين فالاقتصاد:
* خصنا اقتصاد كيفكر فالمواطن البسيط و كيعطيه فرصة فحال اوروبا ماشي اقتصاد كيفكر غير فالفاسي و بناني و صقلي و لماجيدي و ساجيد و الفاميلا ديالهم و صحابهم و لحاسين الكبا ديالهم، راه كاين محمد و احمد و العياشي و فطيمة و خديجة و فوزية و خوتهم و جيرانهم، لي خدام راه ماشي فالربح خاص تزاد ليه فالمانضة، ولي مخدامش: مانضا صغيرة من عند الاقتصاد لي كيفكر فيه حتى يلقا خدمة .. إلى الدولة لقات ليه خدمة و مابغاهاش تحييد ليه.
* الأثمان خاصها تهبط و راه ساهلة تهبط حيت هوما كيديرو الاحتكار فأي حاجة .. فالدوا و الدقيق و المطاحن و دانون و بيمو و التيليفون و الما المعدني و كلشي .. ملي غادي يحيد الاحتكار و تكون منافسة ديال بصح غدي يهبطو الأسعار بوحدهوم ملي غادي نحيدو المحتكرين غدي يوقع الرواج و البيع و الشرا غادي يتحرك.
* الما و الضو نفس الشيء … راه معيقين بالشفرة فيه.
* الناس لي عندهوم شواهد خاصهوم يخدمو .. مع الدولة و لا مع الشركات لي غدي تدور و تروج و تولي تخدم الناس بسهولة.
* خاصنا الضمان الاجتماعي لكاع بنادم.
* سبيطار مزيان فابور .. و راه ممكن و ساهلة.
* بغينا مدرسة مزيانة بأساتذة مزيانين ..فحال البريفي تقريبا و ليني فابور…ماشي المدارس ديال دابا لي كتكلخ الدراري ماشي كتقريهم و تأدبهم.
* فالمغرب دابا كاين ناس عندها الخبز والحرية و ليني ماشي كلشي عندو.. هاد جوج حاجات مهيمين بغيناهوم يكونو عند كولشي.
* بغينا الأمازيغ يكون عندهم أستاذ كيتكلم بالأمازيغية و يعلم ولادهم العربية و الانجليزية و الحساب وملي يمشي للمحكمة يلقا قاضي و محامي و كاتب كيهضرو بالأمازيغية…
* التاريخ ديالنا خاصو يتعاود يتكتب حيت فيه بزاف ديال لكذوب.
الحركة مفتوحة فوجه كاع لي كي آمن بالعز … شرط واحد عندها …ميكونش باغي يدير صريف على ظهر الشعب.. و الفاهم يفهم.. لي هاداك هو غاراضو بلا ما يجي
حركة 20 فبراير 